• Իրավական խորհրդատվություն և ռազմավարական դատավարություն: ԻԱԿ-ը քաղաքացիներին, ԶԼՄ-ներին, ՀԿ-ներին, լրագրողներին և իրավաբանական անձանց իրավական խորհրդատվություն է տրամադրում տեղեկատվություն ստանալու իրավունքի վերաբերյալ` միաժամանակ օգնելով բողոքարկել տեղեկատվություն ստանալու հարցումների անօրինական մերժումները` ներառյալ դատարական կարգով: 2001-2010թթ. ընթացքում կենտրոնը իրավական խորհրդատվություն եւ աջակցություն է տրամադրել 6000 անձի: 2006-2010թթ ընթացքում ԻԱԿ-ը տեղեկատվության տրամադրումն ապօրինի մերժած պետական կառավարման եւ տեղական ինքնակառավարման մարմինների դեմ 28 դատական գործ է հարուց, ինչի շնորհիվ վերականգնվել է տեղեկատվություն ստանալու խախտված իրավունքը:
  
• Դիտարկում: ԻԱԿ-ն իրականացնում է ՏԱ մասին ՀՀ օրենսդրության կիրառման պրակտիկայի դիտարկում պետական և տեղական ինքնակառավարման մարմիններում: Կենտրոնը տարեկան 500-600 տեղեկություն ստանալու հարցումներ է ուղարկում պետական կառավարման և տեղական ինքնակառավարման մարմիններ` այսպիսով լինելով “Տեղեկատվության ազատության մասին” ՀՀ օրենքն ամենաակտիվ օգտագործող կազմակերպություններից մեկը:
  
• Ուսուցումներ: Կենտրոնը ՀՀ ողջ տարածքում ուսուցումների միջոցով օգնում է քաղաքացիներին, ՀԿ, ԶԼՄ եւ քաղաքական կուսակցությունների ներկայացուցիչներին, ինչպես նաեւ պետական պաշտոնյաներին զարգացնել իրենց գիտելիքը Տեղեկատվության ազատության ոլորտում: 2003-2010թթ ընթացքում 5000 մարդ՝ այդ թվում 2200 պաշտոնյա, ստացել է գիտելիք եւ հմտություն տեղեկատվության ազատության օրենսդրության վերաբերյալ։
  
• Հանրային քարոզարշավ: 2001թ.ից մինչ օրս կենտրոնը հրապարակում է “Դու տեղյակ լինելու իրավունք ունես” տեղեկագիրը, որը ՏԱ ոլորտի մասին միակ մասնագիտացված պարբերականն է Հայաստանում: Տեղեկագրի յուրաքանչյուր համարում հրապարակվում է այն պաշտոնյաների “Սեւ ցուցակը”, որոնք ոտնահարել են քաղաքացիների, լրագրողների, հասարակական կազմակերպությունների եւ իրավաբանական անձանց տեղեկատվություն ստանալու իրավունքը: ԻԱԿ-ը ԶԼՄ-ներով լայնորեն հրապարակայնացնում է տեղեկություն ստանալու իրավունքի խախտումները:
  
• Օրենսդրական բարեփոխումներ: Ինֆորմացիայի ազատության կենտրոնն ակտիվ դերակատարում է ունեցել “Տեղեկատվության ազատության մասին” ՀՀ օրենքի մշակման և ընդունման գործում: Ներկայումս ԻԱԿ-ը նախաձեռնել է ՏԱ ենթաօրենսդրական ակտերի մշակման եւ ընդունման գործը: Արդեն մշակվել և ՀՀ կառավարություն ու ՀՀ Ազգային Ժողով է ներկայացվել 2 ենթաօրենսդրական ակտի եւ ՀՀ օրենքներում 7 փոփոխությունների նախագծեր:
  
• ԻԱԿ-ն իրականացնում է ՏԱ ամենամյա մրցանակաբաշխություն, որի ժամանակ ոսկե բանալի է շնորհվում ՏԱ օրենքը լավագույնս կիրառած քաղաքացիներին, ՀԿ-ներին, պետական կառավարման և տեղական ինքնակառավարման մարմիններին եւ լրագրողներին: Տրվում են նաև բացասական մրցանակներ` կողպեքներ, ՏԱ օրենքը խախտող պետական կառավարման և տեղական ինքնակառավարման մարմիններին:

- "Տեղեկատվության ազատություն. Եվրոպա" կազմակերպության հիմնադիր անդամ է: Կազմակերպությունը նպատակ ունի նպաստել Եվրոպայում տեղեկատվության մատչելիության իրավունքի կիրառմանը եւ աջակցել այս իրավունքի առաջընթացին ամբողջ աշխարհում:

- Տեղեկատվության ազատության քաղաքացիական նախաձեռնության անդամ է (Հայաստան): Նախաձեռնությունը միավորում է Հայաստանում ՏԱ ոլորտում գործող երեք խոշորագույն կազմակերպությունները` Ինֆորմացիայի ազատության կենտրոնը, Քաղաքացիական հասարակության ինստիտուտը եւ Տեղեկատվական իրավունքի ինստիտուտը: Այս երեք կազմակերպությունների համագործակցության արդյունքը դարձավ “Տեղեկատվության ազատության մասին” ՀՀ օրենքի մշակումն ու ընդունումը:

- Տեղեկատվության ազատության ամերիկյան ազգային Կոալիցիայի (www.nfoic.org) պատվավոր անդամ է, որին անդամակցում են Միացյալ Նահանգներում գործող 25 կազմակերպություն: